ኢትዮጵያ ቡና በሜዳው ኢትዮ ኤሌክትሪክን አስተናግዶ 1 ለ 0 በመሸነፍ ለሁለተኛ ተከታታይ ጨዋታ በደጋፊዎቹ ፊት ነጥብ ጣለ። በአዲሱ አሰልጣኝና በአዲስ በተዋቀረው ቡድን ላይ ከፍተኛ ተስፋ የጣሉት የቡና ደጋፊዎችም በሜዳቸው ሌላ አሳዛኝ ውጤት ለማስተናገድ ተገደዋል።
የጨዋታውን ብቸኛ ግብ አቤል ሀብታሙ በመጀመሪያው አጋማሽ የጭማሪ ጊዜ፣ በ45+2ኛው ደቂቃ በግሩም የጭንቅላት ኳስ አስቆጥሯል። እረፍት ሊወጣ ጥቂት ጊዜ ሲቀረው የተቆጠረው ይህ ግብ ኤሌክትሪክ በመሪነት ወደ መልበሻ ክፍል እንዲገባ አስችሎታል። በሁለተኛው አጋማሽም ኢትዮጵያ ቡና ወደ ጨዋታው የሚመልሰውን የአቻነት ግብ ማግኘት አልቻለም። ኤሌክትሪክ ያገኘውን ጠባብ መሪነት እስከ መጨረሻው በማስጠበቅ ከቡና ሜዳ ሙሉ ሦስት ነጥብ ይዞ ወጥቷል።
ከውጤቱ ባሻገር በስታዲየሙ የታየው ዝቅተኛ የደጋፊ ቁጥርም ትኩረት የሳበ ነበር። ባለፈው የሜዳ ጨዋታ የታየው የተመልካች እጥረት ጨዋታው በሳምንቱ አጋማሽ፣ በሥራ ቀን ከመካሄዱ ጋር ተያይዞ ሊሆን እንደሚችል ቢገለጽም፣ የዛሬው ጨዋታ ግን እሁድ ከሰዓት ተካሂዶ በርካታ መቀመጫዎች ባዶ መታየታቸው፣ ጉዳዩን በጨዋታ መርሐ ግብር ብቻ ለማማካኘት አዳጋች አድርጎታል።
ይህ ዝቅተኛ ተሳትፎ ደጋፊዎች ከፍተኛ ግምት በተሰጣቸው አሰልጣኝና በአዲሱ ቡድን ላይ ገና በውድድር ዘመኑ መጀመሪያ ምዕራፍ እምነት እያጡ መሆኑን አመላካች ሊሆን ይችላል። ከተመልካች ቁጥር ብቻ ተነስቶ የደጋፊዎችን ስሜት በእርግጠኝነት መወሰን ባይቻልም፣ ተከታታይ የሜዳ ሽንፈቶቹ ከባዶ መቀመጫዎቹ ጋር ተዳምረው በቡና ዙሪያ ያለውን ጥያቄ እያበዙት ይገኛሉ።
ከዛሬው ጨዋታ በኋላ ኢትዮ ኤሌክትሪክ ከአራት ጨዋታዎች ባሰበሰበው 7 ነጥብና በአንድ የግብ ብልጫ በሊጉ ሰንጠረዥ ሁለተኛ ደረጃ ላይ ሲቀመጥ፣ ኢትዮጵያ ቡና በበኩሉ ከአራት ጨዋታዎች ባገኘው 3 ነጥብና በአራት የግብ እዳ በ11ኛ ደረጃ ላይ ይገኛል።