የኢትዮጵያ ከ17 ዓመት በታች የወንዶች ብሔራዊ ቡድን በምሥራቅና መካከለኛው አፍሪካ (ሴካፋ) ዞን የአፍሪካ ዋንጫ ማጣሪያ ውድድር ከዩጋንዳ አቻው ጋር 1 ለ 1 ተለያይቶ ወደ ግማሽ ፍጻሜ ማለፉን አረጋግጧል። በተለይም በመጀመሪያው አጋማሽ ያሳየው ድፍረት፣ የማጥቃት ፍላጎትና የግብ ሙከራዎች ቡድኑ ለወደፊቱ ተስፋ ሰጪ እንደሆነ ያመለከቱ ነበሩ።
በመጀመሪያው አጋማሽ የታየው የኢትዮጵያ የማጥቃት ድፍረት
የኢትዮጵያ ቡድን በመጀመሪያው 45 ደቂቃ ጥሩ እንቅስቃሴ በማሳየት በርካታ የግብ ዕድሎችን መፍጠር ችሏል። ሁለቱም ቡድኖች በማጥቃት ላይ ያተኮረ፣ ፈጣንና ለተመልካች ማራኪ የሆነ እግር ኳስ ያሳዩ ቢሆንም፣ የተፈጠሩትን ዕድሎች ወደ ግብ መቀየር አልቻሉም። በዚህ ጨዋታ ከታዩት አበረታች ነገሮች አንዱ የኢትዮጵያ ወጣት ተጫዋቾች ከርቀት ወደ ግብ ለመምታት ያሳዩት ጥረት ነበር። ብዙ የኢትዮጵያ ቡድኖች ከዚህ በፊት ጨዋታ ላይ እምብዛም የማይታየው ከርቀት ይሚደረጉ የጎል ሙከራዎች፣ በወጣቶቹ እንቅስቃሴ ውስጥ ጎልቶ ታይቷል። ተጫዋቾቹ የርቀት ምቶችን ለመሞከር ከመድፈራቸውም በላይ በርካታ ሙከራዎቻቸውን ታረጌታቸውን የተበቁ ነበሩ። በተለይም በ32ኛው ደቂቃ 10 ቁጥር ለባሹ አክረም አብዱሰላም ፍጹም ቅጣት ክልል ውጪ የመታው ኃይለኛ ኳስ የግቡን አግዳሚ ብረት መትቶ መመለሱ በመጀመሪያው አጋማሽ ከታዩት አስደናቂ የግብ ሙከራዎች አንዱ ነበር። የመጀመሪያው አጋማሽም ያለ ግብ 0 ለ 0 ተጠናቋል።
በሁለተኛው አጋማሽ የዩጋንዳ ብልጫና የኢትዮጵያ ፈጣን መልሶ ማጥቃት
በሁለተኛው አጋማሽ የጨዋታው ሂደት ዩጋንዳ የሜዳ ላይ የበላይነቱን መውሰድ ችላለች። በተለይም አጋማሹ በተጀመረባቸው ደቂቃዎች ኳስን በኢትዮጵያ ሜዳ ላይ በመቀባበል ተከታታይ ጫና ፈጥራለች። የኢትዮጵያ ቡድን በዚህ ወቅት የኳስ ቁጥጥሩን በአብዛኛው ለተጋጣሚው ቢለቅም፣ የመከላከል ቅርሱን ጠብቆ የዩጋንዳን ጥቃት መክቶዋል። በ71ኛው ደቂቃ ኢትዮጵያ በፈጣንና በተቀናጀ መልሶ ማጥቃት የጨዋታውን የመጀመሪያ ግብ በማስቆጠር 1 ለ 0 መምራት ችላለች። ይህ ግብ ቡድኑ በጫና ውስጥም ቢሆን የተጋጣሚውን ክፍተት ተጠቅሞ ውጤታማ ጥቃት መፈጸም እንደሚችል ያሳየ ነበር። ሆኖም የኢትዮጵያ መሪነት የቆየው ለስድስት ደቂቃዎች ብቻ ነበር። ዩጋንዳ በ76ኛው ደቂቃ የአቻነት ግብ በማስቆጠር ውጤቱን 1 ለ 1 አድርጋለች። ከአቻነት ግቡ በኋላ የኢትዮጵያ ተጫዋቾች በመከላከል ረገድ ጥሩ የቡድን ቅንጅትና ሥነ ሥርዓት በማሳየት የዩጋንዳን ተከታታይ ጥቃቶች መመከት ችለዋል። በቀሪዎቹ ደቂቃዎች የተጋጣሚውን ጫና ተቋቁመው የአቻነት ውጤቱን እስከ መጨረሻው ማስጠበቅ ችለዋል።
በአራት ነጥቦች ወደ ግማሽ ፍጻሜ
በዚህ የ1 ለ 1 ውጤት ኢትዮጵያ የምድብ ጨዋታዎቿን በአራት ነጥቦችና በሦስት የግብ ልዩነት ከምደቡ ሁለተኛ ሆና በማጠናቀቅ ወደ ግማሽ ፍጻሜ ማለፏን አረጋግጣለች። በግማሽ ፍጻሜውም ቅዳሜ ከቀኑ 7:00 ሰዓት ጀምሮ የዛሬዋን ተጋጣሚ ዩጋንዳን በድጋሚ ትገጥማለች። ይህ ጨዋታ ወደ ፍጻሜው ከማለፍ ባሻገር ለአፍሪካ ዋንጫ ተሳትፎ ትልቅ ወሳኝነት አለው። የኢትዮጵያ ከ17 ዓመት በታች ብሔራዊ ቡድን አሁን ለአፍሪካ ዋንጫ ለማለፍ ሁለት ዕድሎች ያሉት ሲሆን፣ የመጀመሪያው ዕድል በግማሽ ፍጻሜው ዩጋንዳን በማሸነፍ ወደ ፍጻሜ ማለፍ ነው። ሁለተኛው ዕድል በግማሽ ፍጻሜው ቢሸነፍም በሦስተኛ ደረጃ መወሰኛ ጨዋታ አሸንፎ ማጠናቀቅ ነው። በውድድሩ ከአንደኛ እስከ ሦስተኛ የሚወጡ ቡድኖች ወደ አፍሪካ ዋንጫ የሚያልፉ በመሆኑ፣ ኢትዮጵያ በሁለቱ መንገዶች አንዱን በመጠቀም የውድድሩ ተሳታፊ መሆን ትችላለች።
ተስፋ የሚሰጥ ቡድን፣ ግን መሻሻል ያለባቸው ጉዳዮችም
የኢትዮጵያ ወጣት ቡድን በዚህ ጨዋታ ያሳየው የማጥቃት ድፍረት፣ ከርቀት ወደ ግብ የመምታት ፍላጎትና በጫና ውስጥ የተረጋጋ የመከላከል ቅንጅት አበረታች ጎኖቹ ናቸው። በተለይም ወጣቶቹ በራሳቸው ችሎታ ተማምነው ወደ ፊት ለመጫወት ያሳዩት ፍላጎት ትኩረት የሚስብ ጉዳይ ነው። በሌላ በኩል በመጀመሪያው አጋማሽ የተፈጠሩትን የግብ ዕድሎች አለመጠቀም፣ በሁለተኛው አጋማሽ የኳስ ቁጥጥርን ለተጋጣሚ መልቀቅና የተገኘውን መሪነት ማስጠበቅ አለመቻል ቡድኑ ሊያሻሽላቸው የሚገቡ ጉዳዮች ናቸው። በግማሽ ፍጻሜው ዩጋንዳን በድጋሚ መግጠሙ የኢትዮጵያ ቡድን ከዚህ ጨዋታ ምን ያህል መማር እንደቻለ የሚፈተንበት አጋጣሚ ይሆናል። በተለይም በሁለተኛው አጋማሽ የታየውን የዩጋንዳ ብልጫ ለመቀነስ በመሀል ሜዳ የኳስ ቁጥጥርን ማሻሻልና የተፈጠሩ ዕድሎችን በብቃት መጠቀም ወሳኝ ይሆናል።
የኢትዮጵያ ቡድን አሁን ለአፍሪካ ከ17 አመት በታች ዋንጫ ለመግባት አንድ ጨዋታ ብቻ ማሸነፍ ይቀረዋል። በዚህ የወጣቶች ቡድን የታየው ተስፋ ወደ ተጨባጭ ስኬት የሚቀየርበት ወሳኝ ፈተናም ከፊቱ ተደቅኗል።